Кој капацитет најмногу Ви се допаѓа

Developed in conjunction with Ext-Joom.com



logoscbt

Соопштенија

“Vip Лизгалиштето во Спортскиот центар Борис Трајковски, од денеска ја започнува новата сезона. Покрај термините за рекреативно лизгање тука се и Школата за уметничко лизгање и хокеј тренинзите. Уживањето и добрата забава на лизгањето на вистински мраз е загарантирана.

Билет за рекреативно лизгање со вклучени лизгалки чини 150.00 ден, билет без лизгалки чини 100.00 ден, додека за групна посета (над 30 луѓе) со вклучени лизгалки билетот изнесува 100.00 ден.

Распоредот на термини можете да го погледнете тука:

http://scboristrajkovski.gov.mk/kapaciteti/pdf/temini-lizgaliste-17-18-n.pdf

Подгответе се за уживање на мразот, Ве очекуваме!

Ice-Skating

Сторија од порталот САКАМДАКАЖАМ.МК

ФЛОРЕНС, ТИ СИ БРИТАНСКА И МАКЕДОНСКА ГОРДОСТ

Флоренс Гарет, ќерката на британскиот амбасадор во Македонија Чарлс Гарет, освои три медали на Европското првенство во пливање за лица со Даунов синдром во Париз. Флоренс освои злато во дисциплината 50 метри грбно, сребро на 100 метри грбно и бронза во штафетата на Велика Британија. Ова беше 4. Европско првенство во пливање за лица со Даунов синдром. Флоренс досега учествувала на две светски првенства во пливање за Велика Британија, а ова и е ѝ второ европско првенство, но првпат се враќа со медали.

Флоренс и мајка ѝ Вероник велат дека голема заслуга за успехот имаат и тренерите од пливачкиот клуб „Бета“ во спортскиот центар „Борис Трајковски“ во Скопје.

Тренерите и останатите членови на клубот завчера ѝ приредија и посебен дочек на Флоренс по успехот во Париз. Ѝ послаа црвен тепих во базенот и ја пречекаа со цвеќиња, аплаузи и натпис „Ти си наша гордост“.

„Бев премногу изненадена. Не знаев дека ми спремиле такво нешто. Мислев дека одиме во базенот само да се видиме со тренерот. Но, ме пречека црвен тепих и аплаузи. Беше прекрасно“, ни кажа Флоренс, која ја посетивме во амбасадорската резиденција на Водно.

Флоренс веднаш ги извади трите медали и потоа ги стави на градите. Вероник ни кажа дека изминативе два месеци во „Борис Трајковски“ таа секојдневно се подготвувала за настапот на европското првенство, дури тренирала и по два пати на ден.

„Кога го освои златото, заплакав од среќа. Прво се јавив на Чарлс, а потоа веднаш и на тренерот Илија кој исто така е заслужен за успехот на Флоренс. Пречекот на базенот ме остави и мене без зборови, не беше збунета и пресреќна само Флоренс, туку и јас“, вели Вероник.

Во знак на благодарност за македонските тренери но и за Македонија, Флоренс на настапите го имаше македонското знаме насликано на ноктите на нозете.

„Настапував за Велика Британија, но и Македонија ми е во срцето. Затоа, на ноктите на рацете го имав британското знаме, а на нозете македонското“, ни рече Флоренс.

Вели дека кога тргнала за Париз очекувала само медал во штафетата на Велика Британија, но не и во другите две дисциплини. Доволно за неа било да ги мине квалификациите и да влезе во финалните натпревари.

„Кога го освоив среброто бев пресреќна, но кога испливав како најдобра на 50 метри грбно не можев да верувам. Излегов од базенот и веднаш го ставив британското знаме околу мене. Посебно е чувството да ја слушаш химната, а на градите да имаш златен медал“, раскажува Флоренс, која сега се надева дека ќе учествува на наредното светско првенство во Канада и од таму повторно ќе се врати со медали.

Флоренс плива од мала и постојано се натпреварува. Во нејзината соба има медали од различни натпреварувања. Ја прашавме знае ли колку медали има добиено досега.

„Не знам. Сега ќе ги донесам и ќе ги преброиме заедно сите“.

Избррвме 91 медал, а Флоренс ги зема во раце и ни рече „Дали со волку медали сум добра колку што е Мајкл Фелпс?“.

По настапот на Европското првенство во Париз кое траеше од 29 октомври до 4 ноември, Флоренс неколку дена одмара. Но вели тоа ќе трае само два-три дена, бидејќи за неа пливањето е сè и едвај чека повторно да се врати на тренизните во „Борис Трајковски“.

А. АНТЕВСКА

ЌЕ ПРОПАДНЕВМЕ АКО ГРАДЕВМЕ БАЗЕН И ТЕНИСКИ ТЕРЕНИ КАКО ШТО САКАШЕ МИНАТАТА ВЛАДА, ВЕЛИ ДИРЕКТОРОТ НА САЛАТА „БОРИС ТРАЈКОВСКИ“

Со парите кои минатата Влада ги префрлила за изградба на базен во аква паркот и затворени тениски терени во СЦ „Борис Трајковски“, новото раководство ги покрило долговите кои ги наследило од претходниците. На сметката на СЦ „Борис Трајковски“ биле префрлени пола милион евра за оваа намена. Новиот директор Александар Петровски ги стопирал овие проекти, за како што вели да не се блокира работењето на центарот бидејќи наследил голем број долгови.

intervju-sakam-da-kazam

„Доколку почнеше реализацијата проектите отворен базен во аква паркот, каде сметам дека нема доволно простор за негова изградба и затворени тениски терени, ќе пропадневме. Изградбата на овие објекти повлекува многу повеќе пари. Треба да си ја пуштиме чергата колку што ни се долги нозете. Со одлука на Влада добив дозвола со овие пари да се платат дел од долговите и побарувањата“, вели новиот директор на СЦ „Борис Трајковски“ Александар Петровски.

Петровски освен лоша финансиска состојба вели дека многу работи во салата, базенот, аква паркот и останатите содржи кои ги има во спортскиот центар биле занемарени.

„Хигиената во базенот беше лоша, покривот не е во добра состојба и наредната година се надевам ќе обезбедиме пари за реновирање. И во салата работите не беа ништо подобри, не ми беше јасно зошто лифтовите не работат, а подземниот паркинг никој не го користи. Тој беше претворен во магацин, затрупан со потребни и непотребни работи, 40 камиони со ѓубре изнесовме. Сега тој е функционален, па ѕвездите и спортистите кои настапуваат ќе можат професионално преку паркингот да дојдат до салата, а не како досега преку улица, меѓу посетители и навивачи. Стинг беше првиот кој го сефтоса“, вели Петревски.

Новиот директор вели дека во наредниот период ќе работи и на подобрување на условите и услугите во аква паркот, а од наредната недела ќе биде отворено лизгалиштето.

А. АНТЕВСКА

Почитувани корисници,

Членовите на Diners Club отсега ќе имаат можност за плаќање до 6 рати со Diners Club картичката во Спортскиот Центар Борис Трајковски. Diners Club картичката ќе можете да ја користите при купување карти за натпревари, членство во Vip Фитнес и Vip Аеробик центарот како и за користење на Vip Базенот. А, за семејните дружења на располагање ги имате Vip Кугланата и пинг понг клубот.

Ве очекуваме!

dajners

Од денес па до 29 октомври во Vip Арената на Спортскиот центар „Борис Трајковски“ ќе се одржува 43. Меѓународен саем „Технома 2017“. Дoмaшни и стрaнски прoизвoдитeли од oблaстa нa мeтaлургиjaтa, eлeктрoтeхникaтa, енергетиката, нeмeтaлитe, грaдeжништвoтo, обезбедувањето и заштитата ќе учествуваат на оваа манифестација.

Во организација на „Скопски саем“ паралелно со „Технома“ ќе се одржи и 37. Меѓународна изложба на иновации – МАКИНОВА 2017, каде компаниите ќе ги претстават и промовираат своите иновативни производи и методи.

Традиционално, на „Технома 2017“ ќе се претстават и националните економии на многу земји, покраини и региони, а за зголемување на соработката организирани ќе бидат стручни програми и Б2Б средби.

Работното време на саемот е од 10 до 19 часот.

tehnoma-17